點解你去面試都要準備啲問題嚟問面試官呢？因為問問題會令你顯得更加積極、對份工更加有興趣，實際上亦可以令你獲得更加多資訊，可以更加全面咁考慮呢份工適唔適合你。公司文化係點嘅呢？你應唔應付到呢份工嘅所有需要呢？有冇嘢係職位簡介係冇寫到嘅呢？所有呢啲嘢都可以趁住面試期間尋找答案。

就住公司、職位、人事同埋面試過程，我哋綜合咗一啲適合喺面試期間提出嘅問題。

關於公司

喺互聯網，你可以睇10間公司簡介，起碼有一半都聽落差唔多嘅。有時候聽一啲真係喺入面做緊嘢嘅人描述返間公司，你可以從細節入面知道好多喺互聯網上面得唔到嘅資訊。而呢啲資訊正正可以幫你決定呢一間公司啱唔啱你。

1. 公司文化係點㗎？

乜嘢係一間公司嘅文化呢？公司文化包括價值觀、態度、表現、道德等等。呢啲嘢對於公司入面嘅人與人之間點樣互動、溝通、工作都有好大影響。

例如你行入Hollister同行入Pull and Bear，感覺就會有好大分別，雖然兩間公司買嘅服飾風格同客戶年齡層相差唔遠，但係因為公司文化唔同，售貨員對客戶嘅態度都會唔同，佢哋之間相處都會有所不同。

你可以了解吓公司嘅員工大概係由乜嘢人組成，例如年齡、學歷、種族等等，你覺得自己融入會唔會有困難呢？例如如果公司會有好多唔同種族嘅人一齊工作，大部份時間都要用英文溝通，但係你對自己嘅語文能力冇信心嘅話，可能會做得比較辛苦。

2. 公司會點樣幫員工提升專業能力？

呢條問題，相信好多人都會關心。如果你係有心喺呢個行業持續發展，你會需要喺工作嘅時間或者用工餘\時間持續進修。公司會有乜嘢政策幫助你呢？會唔會提供津貼俾你進修呢？會唔會安排彈性上班時間令你有時間上堂呢？或者係工作上，公司會唔會安排專業嘅人士去教授你或者幫助你完成工作呢？

3. 公司嘅管理風格係點㗎？

管理風格即係一個管理層點樣帶領員工向着一個目標進發，包括點樣決策、分工等等。

以上幾個問題對於你考慮要唔要接受呢份工作好有幫助，因為你需要知道你可唔可以喺公司嘅特定氣氛同管理風格之下開心咁工作。如果新公司同你以前習慣嘅工作模式有好大落差嘅話，你習唔習慣呢？如果你決定接受新嘗試，喺面試嘅時候早啲知道關於新公司嘅風格亦都對你做好心理準備有好大幫助。

關於職位

知道多啲關於呢個職位嘅職責同埋喺公司嘅人事架構入面嘅位置，會對你預視喺呢間公司嘅日常工作會有好大幫助。

4. 我嘅直屬上司會係邊一位？

你可能會同上司、項目經理等等有非常之緊密嘅接觸，但係會唔會有一個更高職位嘅人係帶領住你所屬嘅團隊嘅呢？知道一下你自己將會係公司人事架構嘅邊一個位置對於你調整對喺呢間公司工作嘅期望非常重要。

5. 呢個係一個新職位定係有人離職所以要請人？

了解你將會擔當一個全新嘅職位定係已有嘅職位非常重要，如果你將會加入一個全新、未建立習慣同架構嘅團隊，對你嚟講會唔會太唔清晰呢？你願唔願意做一定程度嘅開荒牛工作呢？

如果你將要擔當一個替補嘅角色，你或者都會想知道上一位員工點解離職，例如佢哋係自願離職定係被解僱呢？或者係佢哋嘅職位因為業務調整而改變左原來嘅職責呢？

6. 呢個職位會有啲乜嘢晉升階梯？

了解一下係呢間公司要晉升需要乜嘢條件，或者通常做幾耐會有得升職。晉升容易嗎？會唔會有啲乜嘢其他條件，例如學歷會阻礙你升職呢？

關於團隊

唔係所有嘅面試都會為面試者介紹團隊。或者未到你第一日返工都唔會俾你認識到同你一齊工作嘅人，但係你可以預先了解一下。

7. 團隊有幾多人？

有時你以為你會喺一個「團隊」入面工作，到頭來先發現原來這裏只得我共你，甚至原來自己注定一人。如果冇同事幫手，你接唔接受到一個咁樣嘅工作環境呢？你負唔負荷到一個人處理晒所有嘢嘅壓力呢？

8. 團隊有冇特定架構？

團隊入面會有一個領袖？或者幾個領袖？或者係冇領袖？如果有領袖，個階級係點樣分嘅呢？如果冇領袖，團隊又習慣點樣決策呢？知道團隊嘅架構，你會更加清楚對方期望你喺團隊擔當點樣嘅位置。

9. 會唔會有團隊活動？

公司會唔會定期為團隊舉行team-building活動或者聯誼活動呢？無論有定冇，你接受與否都好睇個人做事風格。有人會認為團隊相處得越緊密，工作上合作就會更愉快。亦都會有人好唔鍾意喺工餘嘅時間聯誼，或者同工作上嘅同事建立朋友關係。無論你嘅喜好係點樣，預先知道團隊風格都係好事。

10. 團隊日常係點樣溝通？

而家有好多唔同嘅團隊通訊軟件，例如slack, Monday.com等，你習唔習慣用呢？如果你習慣用呢啲通訊軟件，叫你用返電子郵件或者用私人whatsapp同工作夥伴溝通，你又接唔接受得到呢？

關於面試過程

面試過程最可怕嘅未必係面試本身，而係面試之後唔知幾時先至會收到通知，甚至會唔會收到通知。知道公司嘅面試時間表，幾時會落決定，可以免卻自己喺面試過後嘅忐忑帶嚟嘅不安。

11. 你哋希望新請嘅員工幾時開始返工啊？

如果你本身已經會得到呢方面嘅資訊，千祈唔好問呢個問題。除非你真係睇勻晒所有俾你嘅資料都唔知道要請嘅人幾時會開始工作。問咗呢條問題你就會知道大概雇主會咩時候做決定。

12. 最終決定係會由邊個做嘅呢？

同上，如果你本身應該已經知道呢個問題嘅答案，就唔好問啦。但係有時人事部未必講得清楚，而知道最後係邊個決定要請咩人嘅話，你又會更加知道大概佢哋對應徵者有咩期望。

13. 面試過程下一步會係點㗎？

預早知道下一步會做啲乜嘢，你又可以有多啲時間預備下一個階段嘅面試喇！

14. 我可以點樣跟進？

好多時候就算我哋準備幾充足，面試都會有甩漏，問漏咗一啲我哋想知嘅嘢，或者有啲問題返屋企之後先至諗到。你可以問定面試官攞一個聯絡方法，方便你自己跟進面試結果或者查詢。

最後，以上嘅問題雖然全部都一定係關於你好想知道嘅資訊，但係千祈唔好一次過問晒，搞到對方失左時間嘅預算又或者答到厭煩，令人覺得你係一個好多疑累嘅人。記住要把握每一個機會喺面試上留下一個好印象。