「你試幻想一下，每分鐘嘅收入625,000美金，一個鐘頭， 3,700,000,000美金。一日呢， 9億美金收入。」如果你有睇開YouTube，你一定對Brian Cha嘅金句唔陌生。Mirror演唱會後，ig經歷大規模被朋友無限kissy kissy洗版之後，Mirror成員各式各樣嘅廣告開始瘋狂轟炸你嘅story feed：檸檬茶啦、戶戶送啦、護膚品等等，成個ig都係Mirror！呢個就係Digital Marketing電子營銷嘅威力。

電子營銷同傳統營銷有咩分別？

最基本嘅分別就係傳播媒介。傳統營銷就係用傳統媒介推銷產品，包括電視、報紙、巴士站地鐵站燈箱、紅隧廣告牌等等。電子營銷就包括用社交媒體、YouTube、email、網頁、網紅等等。隨着人嘅生活習慣改變，電子營銷越嚟越普及，成為商界嘅新潮流。以下就等我哋分析下當中嘅5個原因啦！

1）疫情改變生活習慣

2019年尾開始，疫情爆發之後世界各地所有人都少咗出街。巴士站、地鐵站嘅燈箱同廣告傳播效率自然大大降低。喺呢個爸爸媽媽都開始睇Netflix、睇YouTube、碌Facebook嘅年代，要接觸到更多嘅潛在顧客就一定要走上網。

2）電子媒體取代傳統媒體

你每日係點樣睇新聞嘅呢？係每日落街買報紙，定係一擘大眼就喺床上面睇唔同新聞網站嘅apps或者朋友分享到社交媒體嘅新聞？由互聯網發展蓬勃開始，電子媒體已經一步一步取代傳統媒體。除非有間公司嘅產品所有受眾都係70歲以上嘅人士，如果唔係佢都一定要選用電子營銷手法。

3）購物模式嘅改變

都市人每日營營役役，返工都用咗你十幾個鐘，冇人再有時間去行街，就算係購買日常所需，都已經上網搞掂。上網買嘢為我哋慳咗唔少時間，令我哋每次出街都可以真真正正一心一意咁同朋友或者屋企人相聚，真正嘅飲啖茶食個包。所以，網上嘅KOL穿搭分享已經漸漸取代咗商場入面嘅櫥窗。

4）溝通方式嘅轉變

我哋而家好多時候同人溝通都係透過電子訊息打字或者錄音，呢種方式漸漸變成我哋最舒服嘅同陌生人溝通嘅方式。所以，而家好多網上商店都善用電子訊息同客戶溝通，例如建立程式自動回覆客戶嘅查問，一來二十四小時都可以無間斷回覆，二來呢種溝通方式可能真係客戶最舒服嘅方式。

5）慳錢、成效同滲透性高

配合大數據分析，電子營銷其實係滲透喺每個人日常生活之中。你上網做嘅每一個舉動、瀏覽嘅每一個網頁、喺每一張圖停留咗幾多秒等等其實都有記錄低，成為大數據。呢一種數據分析令商人可以投其所好，喺最有機會對佢嘅產品有興趣嘅人接觸到嘅版面上面落廣告。例如你係賣女性潔膚液嘅品牌，用電子營銷手法落廣告比起喺紅隧落個大廣告牌有效得多，因為你嘅產品淨係適合某個年紀嘅女士，而每日出入紅隧嘅係咩人都有。紅隧出入嘅人根本有超過一半睇完你嘅廣告都一定唔會去買你嘅產品。同一個價錢，你喺網上面落廣告比起喺紅隧買塊大廣告牌有效好多倍。

電子營銷似乎係未來五至十年嘅營銷行業大趨勢，如果你啱啱畢業有興趣投身marketing行業，或者喺營銷行業做咗一段時間，都好應該考慮吓進修一啲有關電子營銷嘅知識，真真正正為自己爭取一隻係呢個時代嘅鐵飯碗！