好彩，差唔多每一個行業，包括高層或者專業職位都可以塞到一份兼職落時間表。經常有fulltime出去秘撈嘅行業包括有售貨員、市場推廣、教育、護理、軟件工程師等等。其實有好多雇主而家都會更想聘請兼職員工，方便安排時間，又慳返啲長工嘅福利。但係，法律上對兼職嘅定義喺唔同國家各有不同，如果你需要報稅或者申請政府福利等等，就要查一查勞工法例啦。

準備搵工！

1）確保自己能夠處理一份兼職。見工嘅時候，雖然你承諾返得越多，你被聘請嘅機會就越大，但係千祈唔好誇大。僱主都唔想請一個毫無責任感嘅人，講完又返唔到工。搵工前，確保你生活上其他嘢，例如學業係唔會同你嘅工作時間相撞，亦都問吓自己呢份兼職嘅職責你應唔應付得嚟。對於嚟緊嘅學業活動，例如考試等等，或者計劃左嘅旅行，最好如實咁同老闆講。諗吓到時如果有一日你要辭職，老闆都會樂意推薦你比其他人。

2）寫低一份招聘中嘅僱主名單。但係記住，好多兼職工作都唔一定會刊登出嚟，你可能要去親身問吓僱主請唔請人。另外，你亦都可以上求職網站，例如Happyer，Upwork，Fiverr，Indeed同LinkedIn 等。你都可以去招聘展覽睇吓。

3）目標清晰：揀一啲你喜歡嘅公司，例如你本身已經鍾意佢哋嘅貨品或者服務，同意佢哋嘅理念，例如環保、減廢、無動物測試等等。如果你對嗰份工或者嗰間公司完全冇興趣，你都冇乜可能會做得耐。做好對於工作範疇同要求嘅資料蒐集。你亦都可以周圍打聽下有冇朋友或者識得嘅人喺嗰度做嘢，可以問吓，喺見工之前知多一啲啲。

4）整合自己嘅資料。整理好自己嘅履歷，睇吓有冇資料需要更新，根據你要應徵嘅工作寫好你嘅履歷。如果你係職場新鮮人，冇乜工作經驗，你可以補上你嘅課外活動，例如你做過乜嘢學會嘅會長或者其他職位等等，令僱主見到你係一個有責任心、努力解決問題、有創意嘅人。千祈唔好老作啲工作經驗出嚟。呢啲大話一但被拆穿，你嘅口碑就永不翻身。你亦都可以準備推薦信——邀請你嘅老師、前雇主或者義工團嘅負責人為你寫推薦信。

5）如果你啱啱畢業，你可以考慮吓搵定你要返工嘅交通工具。好多僱主都會怕啱啱畢業嘅年輕人唔守時、冇責任心。呢個有機會係面試會問嘅問題。佢哋會想知道你會搭乜嘢車返工，車程幾耐。如果你預先知道，你嘅印象分就會高好多。

報名！

1）如果你係親身去自薦，或者去求職展覽，你可能會被要求現場填表報名表或者即場面試。記住準備好所有所需資料，包括幾份身分證影印本、履歷、證書等等。

2）每份報名表都要自己留個底。如果你有得選擇網上填表或者喺電腦輸入表格然後列印出嚟交嘅話，盡量避免手寫。如果你真係需要手寫，千祈要避免用塗改液或者用擦膠擦得唔乾淨，整污糟或者整皺張紙。寫字要寫得靚啲，如果喺對方面前填表，亦都要填得快啲，肯定啲。

3）整理好網上個人簡歷。就好似你會搜尋僱主一樣，僱主亦都會上網搜尋你。最基本係喺LinkedIn上載或更新最新嘅工作狀態，如果你鍾意嘅話亦都可以寫下網誌。盡量要顯得專業，得體。

4）跟進你報過嘅職位招聘狀況。去到呢一步，如果你之前冇每一份報名都留底嘅話你就冇辦法繼續喇！你可以打電話或者用電郵去跟進一下僱主嘅招聘狀況。如果佢哋已經請咗人，你可以唔需要再等，如果佢哋仲未請人，你亦都可以大概知道佢哋幾時會通知受聘嘅應徵者。

5）準備好面試。網上有好多面試範例同題目，準備好得體咁回答呢啲問題。亦都準備好一套可以着去見工嘅衫，領唔好太低，裙唔好太短，高踭鞋唔好太高等等。兼職面試嘅通知期通常比較短，可能得一至兩日，到時先買衫就嚟唔切㗎啦。

6）同僱主協商待遇時候唔好怕羞。對於兼職員工嘅待遇，係冇一個統一嘅標準。有啲公司會提供同全職一樣嘅待遇，有啲會有休息時間，有啲會計埋飯鐘等等。如果你認為待遇唔夠好，你可以要求提升薪金。

面試過後

1）向僱主寄感謝信

2）如果你冇即時受到聘用，你都可以電郵去跟進一下招聘進度。

3）唔好咁快放棄。兼職職位有時同全職職位一樣需求咁大。