曾經有大學教授講過，冇人再應該諗住一世只喺同一個國家工作。

冇錯，隨着科技發達，國家與國家之間更多聯繫，市場上亦都多咗好多跨國企業。呢個時代要衝出香港，其實唔難。而且，香港係其中一個生活壓力最大、工時最長嘅地方，其實除咗對呢個「家」嘅愛之外，如果由自己嘅身心健康出發，係冇乜原因要留喺香港工作。

無論你最終目標係想移民，定係純粹想出去見下世面，闖一闖，可以考慮吓以下四個國家，佢哋各有特色，佢唔同嘅範疇都有利香港人去工作。

星加坡

星加坡向來都係一個最受香港人歡迎嘅海外工作地點，除咗冇語言隔膜之外，對於教師、金融業、資訊科技行業嘅人才都十分渴求，申請工作簽證亦都相對容易。如果有興趣到星加坡工作甚至移民，可以睇吓呢篇過來人嘅訪問。

澳洲或紐西蘭

澳洲同紐西蘭一向都係working holiday熱門地點，因為佢哋會向18至30歲嘅人士簽發長達12個月嘅working holiday簽證。而working holiday通常都會係做酒店業、旅遊業，或者服務性行業居多。如果有興趣去當地生活，working holiday係唔錯嘅選擇。

你亦都可以參考吓呢個網站，睇吓有啲乜嘢工作可以揀，亦都可以借呢個機會體驗下喺香港比較少機會做到嘅工作，例如做農夫或者照顧動物。

荷蘭

荷蘭非常鼓勵創業，如果你係自由身、自僱人士或者有興趣創業，都會比較容易申請到荷蘭嘅工作簽證。喺荷蘭，工作與生活之間嘅平衡係備受重視嘅，好多有家庭嘅員工甚至乎每日五點就會準時放工。唯一嘅唔好處就係荷蘭嘅街道上、舖頭入面都幾乎唔會有英文，所以如果你想去荷蘭工作，最好都要學返當地嘅語言。

韓國

隨着韓國嘅流行文化掀起左國際熱潮，世界各地嘅人都開始關注韓國人嘅生活同文化。經常聽到韓國嘅職場競爭非常之大，當地人好多畢業之後都不堪壓力。但係對於外國人，情況未必一樣。韓國非常重視建立國際關係，需要識得講唔同語言嘅人。而且，韓國亦都有一個「尋找工作中」嘅簽證，俾你過到去再搵工。如果你又咁啱識韓文，真係可以考慮吓借呢個機會衝出香港㗎！

去海外工作需要考慮嘅嘢其實唔少，好多認真希望去外國做嘢嘅人其實會花上一年甚至幾年嘅時間去準備，了解當地文化，亦都認清楚自己係咪真係希望去嗰個國家工作。所以大家事前記住要做好資料蒐集啊！