雖然我哋成日取笑IT工作者做「IT狗」，但係今時今日，除非係傳統老店、士多、雜貨舖等等，「IT狗」喺一間公司嘅重要性係毋庸置疑嘅。IT部門負責嘅嘢有好多：電腦壞咗要搵佢，網頁死咗要搵佢，有新event要開個新網頁要搵佢，有客落廣告要攞data要搵佢。IT部門真偉大！
無論你係諗緊大學想讀咩、大學未畢業、職場新鮮人定係做耐咗想進修或者轉行，無可否認IT行業係呢個世代嘅鐵飯碗。但係邊款先啱我呢？
IT工作者嘅分工大概有：維持公司日常運作嘅「解難類」、提升公司效率或者幫手擴展業務而整新嘢出嚟嘅「創新類」同埋check住公司嘅科技產品/系統有冇問題嘅「測試類」。當然重有啲專門負責某一個領域嘅，例如網絡保安、數據管理、雲端系統管理等等，就留待大家有興趣嘅話自己深入了解吓喇！
解難類
除非間公司好新或者擴充得非常之快，唔係通常一間公司嘅IT部門最需要係維持日常運作順暢嘅技術支援人員，如果你自問解難能力幾高，或者以下嘅職位會適合你：
- 技術支援專員（ Support Specialist）
有啲似以前中學老師上上吓堂projector開唔着會請嚟幫手嘅IT哥哥/姐姐，一間公司上百部電腦，可想而知每日會遇上幾多問題。但呢種職位除咗幫助公司同事之外，有機會係要服務客人嘅，例如如果一間公司係提供Software as a Service (SaaS)，例如Lalamove、Deliveroo咁，技術支援專員有機會需要即時幫手解決客人遇到嘅問題。 - 資訊科技技術人員（IT Technician）
呢個職位負責嘅嘢比起技術支援專員多，除咗要負責每日嘅解難，更加要分析同計劃出長遠嘅解難方案。呢個職位亦都有機會需要就住公司嘅需要為公司嘅電腦安裝新嘅程式或者軟件，亦都要負責教識公司各部門嘅同事點樣用新嘅軟件。
創新類
就住公司嘅業務擴充，有時會需要編寫新嘅網站或者程式，又或者要改寫之前嘅程式，令用戶體驗或者公司內部運作更加流暢。如果你熟習電腦程式語言，又喜歡創新，以下嘅職位可能啱你：
- 電腦程式設計師
顧名思義，就係要編寫程式，或者改寫程式。好多人以為電腦程式設計師或者編程員淨係需要對住啲程式語言，成個電腦螢幕冇一隻字睇得明，以為佢哋唔使同人溝通，但係對於呢個職位來講，溝通能力嘅要求非常之高，因為你需要明白客戶或者同事嘅要求，然後將佢哋嘅要求轉化成程式語言寫入程式之中！ - 網站開發者/用戶體驗設計師( Web Developer / User Experience Designer)
呢兩個職位都係公司同客戶之間嘅橋樑，係直接透過設計用戶體驗而決定公司以一個點樣嘅形象呈現。呢個職位嘅人需要熟習程式語言之外，亦要處理圖像、管理內容分布等等。溝通能力亦係非常重要。
測試類
同每一種行業一樣，推出一樣產品，必先要經過品質測試。科技產品亦唔例外，甚至產品推出之後亦要不斷搵測試員再搵出產品更加多漏洞或者可改善嘅地方去改善產品。
1）產品測試員（Quality Assurance Tester）
產品測試員需要具備對於要測試嘅產品一定程度嘅知識， 因為佢最大嘅重要性係要測試產品合唔合乎工業水平。遊戲機或者網絡遊戲同埋手機應用程式對呢方面嘅人員需求最大。
2）系統分析專員（Systems Analyst）
系統分析專員主要嘅工作係不斷審視公司設計出嚟嘅系統，無論係內部或者客戶用到嘅。系統分析專員除咗要搵出系統嘅漏洞或者改善嘅地方，更加要運用佢哋嘅知識去幫公司解決問題，有時亦都要協助技術人員訓練公司同事運用新嘅系統。
以上只係好籠統咁樣概括咗幾類最常見嘅資訊科技行業職位，如果你真係有興趣投身呢一方面，可以再睇吓網上面有啲乜嘢職位空缺，想像下自己嘅職業路線。除咗以上嘅分類之外，你可以諗吓你最有興趣研究嘅係資訊科技嘅邊一部份，例如數據分析、雲端科技、區塊鏈科技等等。
